العيد ماجاش؟؟!!

العيد ماجاش؟؟!!
**بيقولوا العيد يا أما جاى
أيه لونه؟؟
بيجى بفرحه ؟؟
بيقولوا
ولون البهجه دا لونه
وليه مايجيش لعندينا؟
وليه ما نشوفه بعنينا
كما الأطفال؟؟
**وكيف ياولدى هانعيد؟؟
يانبضة عمرى ياوليد
وأنا قلبى على اللى راح
بيتقطع
ونار جوايا
صوت فى حشيا بيمزع
وكيف الجرح ياولدى
بنار الظلم راح يهجع
ودم أبوك ودم أخوك
قدامى بيتفرفط
وكيف العيد راح يجينا؟؟
وكيف ها نشوفه بعنينا
اللى مزلوله
وبأدينا اللى مشلوله
وبقلوبنا اللى مكلومه
على اللى راح
**لكن يا أماى
راح يجى لليلنا صباح
وهتأدن ديوك الفجر
تحينا....تصحينا
من الضلمه اللى عميانا
وجرانا بكل خضوع
وأشوف العيد يا أمايا
ملون ذى لون الطيف
ماشفهوشى
بلون الدم
لون الظلم
لون الليل اللى مابيطلعش
ليه نهار
والعب ويا زملاتى
كما الأطفال
وأصلى العيد مع أخواتى
(فى الأقصى)
وأوعى تقولى لى أنسى
لأنى ياأما مش ها أنسى
بإنى طفل
ومستنى يهل العيد
وأعيد ذى كل الناس
بس إدعى لى ياأمايا
ماتعديش جرافه
ولا دبابه طوافه
وتخطف منى
حلم.......... العيد